Ուկրաինան կոչ է արել ՄԱԿ-ի ԱԽ արտահերթ նիստ անցացնել
Ուկրաինան պահանջել է հրավիրել ՄԱԿ-ի Անվտանգության խորհրդի արտահերթ նիստ՝ քննարկելու Բելառուսում մարտավարական միջուկային զենք տեղակայելու Ռուսաստանի մտադրությունը։ Այս մասին ասվում է Ուկրաինայի ԱԳՆ հայտարարության մեջ։
ԱԳՆ-ն Ռուսաստանի հայտարարությունը անվանել է «սադրիչ քայլ», որը խաթարում է միջուկային զսպման ոլորտում միջազգային անվտանգության համակարգը։
«Նման մտադրությունները չեն կարող առանձնահատուկ անհանգստություն չառաջացնել ողջ համաշխարհային հանրության համար»,- նշվում է նախարարության հայտարարության մեջ։
Ուկրաինայի ԱԳՆ-ն կոչ է արել Մեծ Բրիտանիային, Չինաստանին, ԱՄՆ-ին և Ֆրանսիային քայլեր ձեռնարկել «Կրեմլի միջուկային շանտաժին դիմակայելու համար»։
Բացի այդ, գործակալությունը կոչ է արել Մեծ Յոթնյակի (G7) անդամ երկրներին և ԵՄ-ին զգուշացնել Բելառուսի իշխանություններին Բելառուսի համար հետևանքների մասին, եթե վերջինս համաձայնի իր տարածքում ռուսական մարտավարական միջուկային զենք տեղակայել:
«Ռուսաստանը ևս մեկ անգամ հաստատում է իր խրոնիկական անկարողությունը լինել միջուկային զենքի պատասխանատու կառավարիչ՝ որպես պատերազմը զսպելու և կանխելու միջոց, այլ ոչ թե սպառնալիքի և ահաբեկման գործիք։ Աշխարհը պետք է համախմբված լինի նրա դեմ, ով սպառնում է մարդկային քաղաքակրթության ապագային»,- ընդգծել է Ուկրաինայի ԱԳՆ-ն։
Նախարարությունը նաև կոչ է արել Բելառուսի քաղաքացիներին կանխել միջուկային զենքի տեղակայումը Բելառուսի տարածքում, քանի որ դա «երկիրը կվերածի Կրեմլի պատանդի» և «աղետալի հետևանքներ» կունենա նրա բնակիչների ապագայի համար։
