Լաչինի միջանցքով երթևեկությունը «խիստ խոչընդոտված է», սա շուտով կհանգեցնի հումանիտար ճգնաժամի. ԵԽԽՎ մամլո գրասենյակ
Հայաստանի մոնիտորինգի համազեկուցողները ճեպազրույց են տվել և պատմել, թե փետրվարի 17-19-ը Հայաստան կատարած այցից հետո ինչ են արձանագրել: Այս մասին հայտնում է ԵԽԽՎ մամլո գրասենյակը:
Նրանց այցի նպատակն էր գնահատել իրավիճակը Ադրբեջանի հետ սահմանին և Լաչինի միջանցքի մուտքի մոտ։ ՀՀ-ում գտնվելու ընթացքում նրանք եղել են Ջերմուկ, Գորիս և Վարդենիս քաղաքներում, իրենց շրջակայքում, հանդիպել տեղական իշխանությունների և Լաչինի միջանցքի շարունակվող շրջափակման պատճառով Գորիսում արգելափակված Լեռնային Ղարաբաղի բնակիչների հետ։
Համազեկուցողների խոսքով, միջանցքով երթեւեկությունը «խիստ խոչընդոտված է»՝ անհնարին դարձնելով առաջին անհրաժեշտության ապրանքների տեղափոխումը։ Այս իրավիճակը շուտով կարող է հանգեցնել հումանիտար ճգնաժամի։
Անդրադառնալով 2020 թվականի նոյեմբերին ստորագրված Եռակողմ հայտարարությանը, բանախոսները կոչ արեցին Ադրբեջանին թույլ տալ իրավիճակի անկախ գնահատում։ «Մենք կոչ ենք անում Ադրբեջանի իշխանություններին թույլատրել անկախ փաստահավաք այցը և թույլատրել անկախ լրագրողներին ազատ աշխատել ողջ տարածաշրջանում»,- ավելացրել են պարոն Կիլյունենը և տիկին Օբերգը:
