Ղազախստանը նոր խորհրդարան է ընտրում. Նազարբաևը վիրահատությունից հետո առաջին անգամ հանրության առջև է երևացել

 Ղազախստանում այսօր տեղի են ունենում խորհրդարանի մաժիլիսի (ստորին պալատի) և մասլիխաթների ( տեղական ներկայացուցչական մարմինների) պատգամավորների ընտրություններ։ Ղազախստանի նախագահ Կասիմ Ժոմարտ Տոկաևն արդեն քվեարկել է մաժիլիսի պատգամավորների ընտրություններում, հաղորդում է Ղազախստանի ղեկավարի մամուլի ծառայությունը։

Ղազախստանի նախկին նախագահ Նուրսուլթան Նազարբաևը սրտի վիրահատությունից հետո առաջին անգամ երևացել է հանրությանը, մասնակցել է Մաժիլիսի (խորհրդարանի ստորին պալատի) և տեղական ներկայացուցչական մարմինների պատգամավորների արտահերթ ընտրությունների քվեարկությանը։

Ընտրություններ անցկացվում են Ղազախստանում և արտերկրում բացված  ավելի քան 10,2 հազար ընտրատեղամասերում։ 19,7 միլիոնից ավելի բնակչություն ունեցող Ղազախստանում ընտրողները գերազանցում են 12,3 միլիոնը։

Ութերորդ գումարման խորհրդարանը, ի տարբերություն նախորդների, կընտրվի խառը համակարգով՝ պատգամավորների 70%-ը կանցնի կուսակցական ցուցակներով, մնացած 30%-ը՝ միամանդատ ընտրատարածքներով։ Ընդհանուր առմամբ պետք է ընտրվի մաժիլիսի 98 պատգամավոր՝ 69-ը կուսակցական ցուցակներից, 29-ը՝ միամանդատ ընտրատարածքներից։

Նախկինում պալատի ընտրություններն անցկացվում էին համամասնական ընտրակարգով՝ կուսակցական ցուցակներով։