Թուրքիան կարող է սկսել Ֆինլանդիայի՝ ՆԱՏՕ-ին անդամակցության վավերացման գործընթացը․ Էրդողան

Թուրքիան պատրաստ է սկսել ՆԱՏՕ-ին Ֆինլանդիայի անդամակցության վավերացման գործընթացը: Նման հայտարարություն է արել Թուրքիայի առաջնորդ Ռեջեփ Թայիփ Էրդողանը Ֆինլանդիայի իր գործընկեր Սաուլի Նիինիստոյի հետ բանակցություններից հետո, որոնք նվիրված են եղել երկրի՝ Հյուսիսատլանտյան դաշինք մտնելուն։

«Ֆինլանդիան կոնկրետ քայլեր է ձեռնարկել հուշագրի պայմանները կատարելու համար, որոնք անհրաժեշտ են դաշինքին միանալու համար: Մենք պատրաստ ենք և որոշել ենք սկսել Ֆինլանդիայի՝ ՆԱՏՕ-ին անդամակցության վավերացման գործընթացը: Համոզված ենք, որ Ֆինլանդիան ակտիվ դեր կխաղա դաշինքի անվտանգությունը ապահովելու գործում»,- ընդգծել է Թուրքիայի ղեկավարը։
 

Հայտնի է նաև, որ Անկարան կարող է դաշինքին Ֆինլանդիայի անդամակցության վավերացման քվեարկություն անցկացնել մինչև մայիսի 14-ը (համապետական ​​ընտրություններից առաջ)։ Էրդողանը վստահություն է հայտնել, որ երկրի՝ դաշինք մտնելու հարցը կլուծվի մինչ այդ օրը։ Ինչ վերաբերում է Շվեդիային, ապա նրա անդամակցությունը կախված կլինի Ստոկհոլմի քայլերից, հավելել է նա։

Ստոկհոլմում Ղուրանի այրման ակցիայից հետո Ռեջեփ Թայիփ Էրդողանը հայտարարել է, որ Շվեդիան չպետք է սպասի Անկարայի աջակցությանը ՆԱՏՕ-ին անդամակցելու հարցում։