Էրդողանի հայտարարություններից հետո Ֆինլանդիան անմիջապես կապ է հաստատել Թուրքիայի հետ
Ֆինլանդիայի նախագահ Սաուլի Նիինիստոն ասել է, որ երկիրն անմիջապես կապ է հաստատել Թուրքիայի հետ նախագահ Ռեջեփ Թայիփ Էրդողանի հայտարարություններից հետո։ Այս մասին նա հայտնել է Helsingin sanomat-ին։
Էրդողանը նախօրեին ասել էր, որ Թուրքիան կարող է որոշում կայացնել Ֆինլանդիայի՝ ՆԱՏՕ-ին անդամակցելու վերաբերյալ, ինչը «ցնցելու» է Շվեդիային։
Ավելի վաղ Թուրքիայի արտգործնախարար Մևլութ Չավուշօղլուն հայտարարել էր, որ Թուրքիան կարող է առանձին քննարկել Շվեդիայի և Ֆինլանդիայի՝ ՆԱՏՕ-ին անդամակցելու դիմումները, սակայն վերջնական որոշումը կկայացվի Հելսինկիում և Ստոկհոլմում։
Անկարայում կայացած մամուլի ասուլիսում գերատեսչության ղեկավարն ասել է, որ եթե ՆԱՏՕ-ում կամ այս երկրներում համապատասխան որոշումներ կայացվեն, Թուրքիան կկարողանա առանձին գնահատել Հյուսիսատլանտյան դաշինքին միանալու Ֆինլանդիայի և Շվեդիայի հայտերը։
«Այդ իսկ պատճառով Թուրքիայի նախագահ Էրդողանը խոսում է Ֆինլանդիայի կողմից դիմումի հնարավոր այլ գնահատականի մասին», -ասել է նախարարը։
Էրդողանի խոսքով՝ Ֆինլանդիան չպետք է թույլ տա նույն քայլերը, ինչ Շվեդիան։