Թուրքիայի ՊՆ ղեկավարը` Փարիզում քրդերի հետ բախումների մասին
Փարիզի անկարգությունները «օձի խայթոցներ» են, որը «սնվել է ֆրանսիացիների կողմից»։ Թուրքիայի պաշտպանության նախարար Հուլուսի Աքարն այսպես է բնութագրել Ֆրանսիայի մայրաքաղաքում տեղի ունեցած վերջին իրադարձությունները, գրում է Kp.ru-ն։
«Փարիզի վերջին իրադարձությունները ցույց տվեցին, որ ֆրանսիացիների կողմից կերակրվող օձը սկսել է խայթել նրանց», - ասել է Աքարը «Անադոլու» լրատվական գործակալությանը, այդպիսով այլաբանորեն Փարիզի անկարգությունների համար մեղադրելով Թուրքիայում արգելված Քրդստանի աշխատավորական կուսակցության ներկայացուցիչներին:
Ըստ Աքարի՝ հենց PKK-ի ներկայացուցիչներն են «այրում Փարիզի փողոցները»։
Նախարարն ասել է, որ «այժմ բոլորը պետք է տեսնեն այս ահաբեկչական կազմակերպության իրական դեմքը»։
Հիշեցնենք, որ Փարիզում երեք ակտիվիստների սպանությունից հետո զանգվածային բախումներ են տեղի ունեցել քրդերի և ոստիկանության միջև։
Քրդերի ներկայացուցիչներն արձագանքել են սպանությանը որպես էթնիկ անհանդուրժողականության ակտ:
