Փարիզում քրդերը կրկին բազմամարդ ակցիաներ կանեն
Ֆրանսիայի քրդական դեմոկրատական խորհուրդը ևս երեք ցույց է նախատեսում Փարիզում հունվարի 4-ին, 7-ին և 9-ին՝ ի հիշատակ ուրբաթ օրը գնդակահարված քրդերի, ինչպես նաև 2013 թվականի հունվարին սպանված երեք ակտիվիստների: Այս մասին РИА Новости-ին հայտնել է կազմակերպության մամուլի քարտուղար Բերիվան Ֆիրաթը։
«Նույնիսկ ուրբաթ օրը տեղի ունեցած հարձակումից առաջ մենք պլանավորում էինք հունվարի 4-ին հանրահավաք անցկացնել՝ ի հիշատակ 2013 թվականին սպանված ակտիվիստների, հիմա մենք կշարունակենք մեր գործողությունները: Հունվարի 7-ին մենք շատ լայնածավալ ակցիա ենք կազմակերպելու ԵՄ մակարդակով, և հունվարի 9-ին Փարիզի քաղաքապետարանի կողմից կազմակերպվելու է հիշատակի միջոցառում»,- ասել է նա։
Ֆիրաթը նշել է, որ քրդական համայնքը ուշադիր հետևում է հետաքննությանը և չի հավատում, որ ուրբաթ օրը քրդերի վրա հարձակման մեջ մեղադրվողը հոգեկան հիվանդ է, ինչպես պնդում է հետաքննությունը։
«Նա եկավ բացարձակ հանգիստ և ասաց, որ եկել է քրդերին սպանելու, ոստիկաններին ասել է, որ ատում է քրդերին, նա խելագար չէ», - հավելել է խոսնակը։
Ուրբաթ օրը 69-ամյա տղամարդը կրակ է բացել Փարիզի 10-րդ շրջանի քրդական մշակութային կենտրոնի մոտ գտնվող փողոցում՝ սպանելով երեք քրդերի։ Հետագայում նա իր գործողությունները վերագրեց ռասիզմին և օտարերկրացիների նկատմամբ պաթոլոգիական ատելությանը:
