«Սա դեռ սկիզբն է». Էրդողանը՝ Սիրիայի հյուսիսում և Իրաքում գործողությունների մասին
Թուրքիայի նախագահ Էրդողանը հայտարարել է, որ Սիրիայի հյուսիսում և Իրաքում թուրքական զինված ուժերի գործողությունները «դեռ սկիզբն են», Անկարան հաստատակամ է սահմանների անվտանգությունն ապահովելու հարցում։
Անկարան կիրակի օրը օդային գործողություն է իրականացրել Սիրիայի հյուսիսում արգելված Քրդստանի աշխատավորական կուսակցության սիրիական թևի դեմ։ Հաղորդվում է, որ հարվածներ են հասցվել Քոբանի քաղաքին, ինչպես նաև Հյուսիսային Իրաքում։ Թուրքիայի նախագահ Էրդողանը գործողությունն անվանել է հաջողված և չի բացառել, որ դրան կհաջորդի ցամաքային գործողություն։ Թուրքիայի պաշտպանության նախարար Հուլուսի Աքարը երեքշաբթի գիշերը հայտարարել է Սիրիայում և Իրաքում «Ճանկ-թուր» գործողության երկու օրվա ընթացքում 184 գրոհայինի ոչնչացման մասին։
«Մեր սկսված գործողությունները մեր սահմանների անվտանգությունն ապահովելու միջոցառումների միայն սկիզբն են»,- ասել է Էրդողանը իշխող կուսակցության նիստում։