ՏԵՍԱՆՅՈՒԹ․ Պատերազմի ու քովիդի միջով անցնելով, բյուջե ենք առաջարկում, որը 2018-ի բյուջեից ավել է 75%-ով․ վարչապետ

2023-ի բյուջեի հարկային եկամուտի մասը պլանավորում ենք 2 տրլն 204 մլրդ դրամ, որը 2018-ի ցուցանիշից ավել է 946 մլրդ դրամով կամ 75,1 տոկոսով: Այս մասին, այսօր՝ նոյեմբերի 16-ին, ԱԺ-ում 2023 թվականի բյուջեի քննարկումների ժամանակ իր ելույթում նշեց վարչապետ Նիկոլ Փաշինյանը:

«Այսինքն հեղափոխությունից 4,5 տարի անց, անցած լինելով պատերազմի ու կովիդի միջով, առաջարկում ենք բյուջե, որը 2018-ի բյուջեից ավել է 75 տոկոսով:

Պաշտպանության ոլորտի ծախսերը նախատեսված են 509 մլրդ դրամ, աճը 2018-ի նկատմամբ 113 տոկոս, այսինքն կրկնապատիկից ավելի: Իսկ 2022-ի նկատմամբ աճը կազմել է 47 տոկոս: Այս թվերի հետեւում գոյություն ունեցող բովանդակությունը նույնքան կարեւոր է: Ուզում եմ ուրախությամբ ընդգծել, որ մեկնարկում է կամավոր ատեստավորման միջոցով զինծառայողների աշխատավարձերի առնվազն կրկնապատկումը: Մենք դեպքեր կունենանք, որ նույնիսկ եռապատիկ ավելացում կլինի: Մենք անցում ենք կատարում պրոֆեսիոնալ բանակի: Այն մարդիկ, որոնք կընտրեն ռազմական մասնագիտությունը, եւ ավարտելով ռազմաուսումնական հաստատությունը եւ կստանան նշանակում, այդ պահին կստանան բնակարան, որը կլինի իրենց սեփականությունը: Այն օտարելու իրավունք կստանան ծառայությունն ավարտելուց հետո»,-հայտարարեց Նիկոլ Փաշինյանը:

Նա նշեց, որ բանակի բարեփոխման գործընթացը սկսված է եւ ամեն ամսվա հետ նոր թափ է ստանալու: