ՏԵՍԱՆՅՈՒԹ․ Զելենսկին օդային տագնապ է հայտարարել ամբողջ Ուկրաինայում․ ի՞նչ իրավիճակ է Կիևում
Ուկրաինայի նախագահ Վլադիմիր Զելենսկին օդային տագնապ է հայտարարել ամբողջ երկրում, այդ մասին նա գրել է իր Telegram ալիքում։
«Օդային ռմբակոծությունը չի դադարում ամբողջ Ուկրաինայում։ Հրթիռային հարվածներ կան, ցավոք սրտի, կան զոհեր և վիրավորներ»,- ասել է նա։
Strana.ua-ի փոխանցմամբ՝ պայթյուններ են տեղի ունեցել երկրի 12 շրջաններում եւ մայրաքաղաքում։
Ավելի վաղ ուկրաինական լրատվամիջոցները հայտնել էին պայթյունների մասին Կիևում, ինչպես նաև Ժիտոմիրի և Կիևի շրջաններում, Լվովում և Տերնոպոլում։
Ուկրաինայի ՆԳՆ ղեկավարի խորհրդական Անտոն Գերաշչենկոն թվիթերյան իր էջում գրել է, որ Կիևում հրթիռներից մեկն ընկել է Վոլոդիմիրսկի փողոցում՝ Հրուշևսկու հուշարձանի մոտ, որտեղ գտնվում է Ուկրաինայի անվտանգության ծառայության գրասենյակը։
Իշխանությունները քաղաքացիներին կոչ են արել մնալ ապաստարաններում: Կիևի քաղաքապետ Վիտալի Կլիչկոն հայտարարել է կենտրոնական փողոցների արգելափակման մասին և արվարձանների բնակիչներին խնդրել է չմեկնել Կիև։
