Արցախցին շարունակելու է իր պայքարը` ինքնորոշման իրավունքի իրացման համար. պատգամավոր
Արցախահայությունն անկախության համար պայքարը շարունակելու իր կամքն էր արտահայտում։ Այս մասին 24News-ին ասաց Արցախի Հանրապետության Ազգային ժողովի «Ազատ Հայրենիք - ՔՄԴ» խմբակցության ղեկավար Արթուր Հարությունյանը՝ անդրադառնալով երեկ գիշերը Ստեփանակերտում տեղի ունեցած հանրահավաքին։
Ստեփանակերտում հանրահավաքի ժամանակ հավաքվածների ձեռքին կային «Մենք Ադրբեջանի քաղաքացիներ չենք», «Արցախն Ադրբեջան չէ», «Ալիեւ ահաբեկիչ», «Մենք խաղաղություն ենք ուզում» գրություններով պաստառներ։
Մասնակիցների մի հատվածն էլ պահանջում էր, որպեսզի Արցախի նախագահ Արայիկ Հարությունյանը գա և իրենց մտահոգող հարցերի վերաբերյալ բացատրություններ տա։ Պարզաբանումների համար ցուցարարների մի մասին տեղում հանդիպել էին Արցախի ԱԺ նախագահ Արթուր Թովմասյանը, ԱԺ-ուն մեծամասնություն կազմող «Ազատ հայրենիք - ՔՄԴ»-ի ղեկավար Արթուր Հարությունյանը։
Պատգամավոր Արթուր Հարությունյանի խոսքերով, արցախահայությունը շարունակելու է իր պայքարն Արցախի համար. «Մենք անվտանգության խորհրդի վերջին հայտարարությամբ մեր քայլերի պարզաբանումները տվել ենք։ Գործընթացը լինելու է շարունակական, տեղեկատվություն կտրվի իրավիճակի մասին»։
Հոկտեմբերի 7-ին ԱՀ ԱԺ խմբակցությունները համատեղ հայտարարություն էին տարածել՝ կոչ անելով ԵԱՀԿ Մինսկի խմբի համանախագահ երկրներին՝ Ռուսաստանի Դաշնությանը, Ամերիկայի Միացյալ Նահանգներին, Ֆրանսիային և ՄԱԿ անդամ մյուս 190 պետություններին` ճանաչել Լեռնային Ղարաբաղի Հանրապետությունը, «դրանով իսկ ի չիք դարձնելով նրա բնակչության առջև ծառացած գոյաբանական լրջագույն սպառնալիքները»։
Պատգամավոր Արթուր Հարությունյանն ասաց, որ շարունակելու են Արցախի անկախության ճանաչմանն ուղղված քայլերը. «Մենք մեր պայքարը շարունակելու ենք մեր ինքնորոշման իրավունքի իրացման համար»։
Մեծամասնական խմբակցության ղեկավարն ասաց, որ ԱՀ նախագահն այս հարցի վերաբերյալ իր դիրքորոշումը հայտնել է թե՛ սեպտեմբերի 15-ին հղած ուղերձում, թե՛ Արցախի անվտանգության խորհրդի վերջին նիստին։ «Դիրքորոշումը հստակ է և չի փոխվելու», - եզրափակեց նա։
