Հայաստանի արտաքին գործերի նախարար Արարատ Միրզոյանը Վրաստան կատարած աշխատանքային այցի շրջանակում հանդիպել է Վրաստանի վարչապետ Իրակլի Ղարիբաշվիլիի հետ:

Հանդիպման ընթացքում քննարկման կենտրոնական թեման ժամեր անց Թբիլիսիում կայանալիք հանդիպումն էր Արարատ Միրզոյանի և Ադրբեջանի արտգործնախարար Ջեյհուն Բայրամովի միջև:

Ղարիբաշվիլին ընդգծել է դրական երկխոսություն ունենալու կարևորությունը, հայտնում են Վրաստանի կառավարության լրատվական ծառայությունից:

Կողմերն անդրադարձել են նաև հայ-վրացական երկկողմ հարաբերություններին ու ապագայում համագործակցության հեռանկարներին՝ մասնավորապես տնտեսության ու երկկողմ առևտրի բնագավառներում:

Քննարկվել է իրավիճակը Հարավային Կովկասում։

Անդրադառնալով տարածաշրջանում տիրող իրավիճակին՝ Վրաստանի կառավարության ղեկավարը և Հայաստանի Հանրապետության արտաքին գործերի նախարարը նշել են, որ կարևոր է համատեղ ջանքեր գործադրել մարտահրավերներին դիմակայելու համար՝ ընդգծելով խաղաղ տարածաշրջան ունենալու անհրաժեշտությունը: