Շանհայում շենքի 3-րդ հարկի ավտոկայանատեղիից վայր է ընկել Nio մակնիշի էլեկտրական թեստային մեքենա. կան զոհեր

Շանհայում շենքերից մեկի երրորդ հարկում գտնվող ավտոկայանատեղիից ընկել է Nio մակնիշի էլեկտրական թեստային մեքենան: Սրահում գտնվող երկու մարդիկ մահացել են, հայտնում է CNBC-ն՝ վկայակոչելով ընկերության հաղորդագրությունը, որը հինգշաբթի օրը հրապարակվել է չինական Weibo սոցիալական ցանցում։
 

Վթարը տեղի է ունեցել չորեքշաբթի Պեկինի ժամանակով 17:20-ի սահմաններում։
 

CNBC-ի փոխանցմամբ՝ վթարի մանրամասները րոպեներ անց ջնջվել են սոցցանցից, իսկ ավելի ուշ՝ ավելացվել նորը:
 

Նոր գրառման մեջ արտադրողն ընդգծել է, որ դեպքի վայրում վերլուծությունից հետո կարելի է նախնական կերպով հաստատել, որ տեղի ունեցածը «վթար» է, որը չի առաջացել բուն մեքենայի կառուցվածքային խնդիրներից։
 

Nio-ն չինական խոշորագույն ընկերություններից մեկն է, որը հավակնում է լինել էլեկտրական մեքենաների արդյունաբերության առաջատարը: Ընկերությունը մասնագիտացած է իր մեքենաներում փոխարինելի մարտկոցների օգտագործման մեջ՝ լիցքավորման ժամանակը նվազեցնելու համար: