«Սկսվել է աննախադեպ հակառուսական արշավ»․ ՌԴ-ն արգելել է Ճապոնիայի վարչապետի մուտքը երկիր

Ռուսաստանը մուտքի արգելքի պատժամիջոցներ է սահմանել Ճապոնիայի վարչապետ Ֆումիո Կիսիդայի և Ճապոնիայի 62 այլ քաղաքացիների նկատմամբ։ Այս մասին ասվում է ՌԴ ԱԳՆ չորեքշաբթի տարածած հաղորդագրության մեջ։

«Ֆումիո Կիսիդայի վարչակազմը սկսել է աննախադեպ հակառուսական արշավ՝ թույլ տալով անընդունելի հռետորաբանություն Ռուսաստանի Դաշնության դեմ՝ ներառյալ զրպարտությունն ու ուղղակի սպառնալիքները։ Այս ընթացքին համահունչ՝ Տոկիոն գործնական քայլեր է ձեռնարկում, որոնք ուղղված են բարիդրացիական կապերի վերացմանը, վնաս հասցնելու Ռուսաստանի տնտեսությանը և մեր երկրի միջազգային հեղինակությանը»,- ասվում է հաղորդագրությունում։

Դիվանագիտական առաքելությունը նշել է, որ հաշվի առնելով Տոկիոյի նման գիծը և Ճապոնիայի կառավարության կողմից Ռուսաստանի քաղաքացիների, այդ թվում՝ պետության բարձրագույն ղեկավարության դեմ կիրառված անձնական պատժամիջոցները, որոշում է կայացվել անժամկետ արգելել Ճապոնիայի 63 քաղաքացիների, այդ թվում՝ վարչապետ Կիսիդայի, Նախարարների կաբինետի գլխավոր քարտուղար Հիրոկազու Մացունոյի, արտգործնախարար Յոշիմասա Հայաշիի, պաշտպանության նախարար Նոբուո Կիշիի և մի շարք այլ բարձրաստիճան ներկայացուցիչների մուտքը Ռուսաստանի Դաշնություն։ Ամբողջական ցանկը հասանելի է ՌԴ ԱԳՆ կայքում։

Ճապոնիան նախկինում ընդունել է Ռուսաստանի Դաշնության դեմ սահմանափակումների մի քանի փաթեթ՝ կապված Ուկրաինայի շուրջ ստեղծված իրավիճակի հետ։ Անհատական պատժամիջոցների տակ է հայտնվել ընդհանուր առմամբ ավելի քան 500 մարդ, այդ թվում՝ երկրի ղեկավարության ներկայացուցիչներ, պաշտոնյաներ և գործարարներ։