Հրապարակվել է 2021 թվականին ամենամաքուր և ամենաաղտոտված օդ ունեցող երկրների վարկանիշային ցանկը

Հրապարակվել է 2021 թվականին ամենամաքուր և ամենաաղտոտված օդ ունեցող երկրների վարկանիշային ցանկը:

Անցյալ տարի գրեթե ոչ մի երկիր չի բավարարել ԱՀԿ օդի որակի ստանդարտը։ Որոշ տեղերում դրա աղտոտվածության ցուցանիշները վերադարձել են իրենց նախկին արժեքներին՝ 2020 թվականին «Կովիդ-19» համաճարակի պատճառով որոշակի բարելավումից հետո:

Շվեյցարական IQAir ընկերությունը հրապարակել է օդի որակի համաշխարհային զեկույց 2021թ. Վերլուծության հիմքում ընկած տեղեկատվությունը ստացվել է օդի որակի մոնիտորինգի տասնյակ հազարավոր կայաններից, որոնք շահագործվում են կառավարությունների, շահույթ չհետապնդող կազմակերպությունների, հետազոտական ​​հաստատությունների, կրթական հաստատությունների, ընկերությունների և գիտնականների կողմից:

Հետազոտությունն իրականացվել է մոլորակի 117 երկրների 6475 քաղաքներում: 

[fede75448be4766d9625f8ab235231b3.png]

Ինչպես նշում են զեկույցի հեղինակները, օդի աղտոտվածությունը համարվում է շրջակա միջավայրի համար ամենալուրջ սպառնալիքը, քանի որ այն ամեն տարի յոթ միլիոն կյանք է խլում։ Այն առաջացնում և սրում է բազմաթիվ հիվանդություններ՝ ասթմայից մինչև քաղցկեղ, թոքերի և սրտի հիվանդություններ, իսկ տնտեսության համար օրական ծախսերը կազմում են մոտ ութ միլիարդ դոլար: 2019 թվականին օդում վնասակար նյութերի առկայությունը (ինչպես փակ, այնպես էլ դրսում) պատճառ է հանդիսացել մահացությունների մոտավորապես 12%-ի համար։

Այսպիսով, ամենաաղտոտված օդն ունի Բագլադեշը: Նրան հաջորդում է Չադը, հետո Պակիստանը: 

Հայաստանը 33.9 ցուցանիշով օդի աղտոտվածության երկրների ցանկում 19-րդ տեղում է: 

Սահմանակից պետություններում իրավիճակը հետեւյալն է. Իրանը 30. 3 ցուցանիշով 24-րդ տեղում է, Վրաստանը 21.0 ցուցանիշով 42-րդն է, Թուրքիան 20.0՝ 46-րդ, Ադրբեջանը 17,6՝ 57-րդ-ն է: ՌԴ ցուցանիշն էլ հետեւյալն է. 12.3՝ 80-րդ տեղ: 

Ամենամաքուր օդը, ըստ IQAir-ի զեկույցի, ունեն Պուերտո Ռիկոն, Միացյալ Նահանգների Վիրջինյան կղզիները, ինչպես նաև Խաղաղ օվկիանոսում գտնվող Նոր Կալեդոնիա կղզիները: 

[4d4f658b9391f21e56f34c6c6ea6a531.png]

PM2.5-ը օդը պարբերաբար չափվող վեց աղտոտիչներից մեկն է: Հիմնական PM2.5-ները ներառում են սուլֆատներ, նիտրատներ, մուր և ամոնիում: Բնության մեջ նրանց ընդհանուր աղբյուրներն են փոշու և ավազի փոթորիկները, անտառային հրդեհները: Օդի աղտոտման հիմնական պատճառներ նշում են ներքին այրման շարժիչները, արդյունաբերական և գյուղատնտեսական գործունեությունը, շինարարությունը և բնակելի տարածքներում փայտի ու ածուխի այրումը: