ԼՈՒՍԱՆԿԱՐՆԵՐ. Տոյվո Կլաար. «Ուրախ եմ, որ հնարավորություն ունեցա հայրենադարձելու 10 հայ զինծառայողների»

Հարավային Կովկասի հարցերով Եվրամիության հատուկ ներկայացուցիչ Տոյվո Կլաարը ողջունում է Ադրբեջանի որոշումը Հայաստանին 10 զինծառայող փոխանցելու մասին: 

«Ուրախ եմ, որ հնարավորություն ունեցա հայրենադարձելու 10 հայ զինծառայողների», – գրել է Կլաարը Twitter-ում: 

[530bc6a46184ffe68fbb3921df5764b9.jpg]

[f63791f9e701cdb85cfb8463a24a6d66.jpg]

Եվրամիության հատուկ ներկայացուցիչն Ադրբեջանի այդ քայլն անվանել է «կարևոր ժեստ հումանիտար հարցերի լուծման գործընթացում»։ 

Կլաարը նաև նշել է, որ ԵՄ-ն կշարունակի աշխատել Ադրբեջանի և Հայաստանի հետ՝ երկու երկրների ղեկավարների հետ Եվրոպական խորհրդի նախագահի հաջող հանդիպումների համար: 

[9fe805ff0763cf4fed566f21b98f40df.jpg]

Ավելի վաղ ՀՀ ԱԳՆ-ից հայտնել էին, որ Եվրոպական խորհրդի նախագահ Շառլ Միշելի միջնորդությամբ 10 ռազմագերիներ վերադարձան հայրենիք։  

Հիշեցնենք, որ դեկտեմբերի 15-ին Բրյուսելում կայացել էր Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։ Տեղի էր ունեցել նաև Նիկոլ Փաշինյանի, Ֆրանսիայի նախագահ Էմանուել Մակրոնի ու Իլհամ Ալիևի եռակողմ հանդիպումը։ 

Հիշեցնենք, որ դեկտեմբերի 4-ին Հայաստան էին վերադարձել նոյեմբերի 16-ին գերեվարված ևս 10 զինծառայողներ։