Ինչպես պաշտոնյաններն են իրենց պահում, այնպես էլ ժողովուրդը. Աղվան Վարդանյանը` հայհոյանքը քրեականացնելու օրենքի մասին
7-րդ գումարման խորհրդարանն իր վերջին շնչում օրենք ընդունեց՝ ծանր վիրավորանքի քրեականացնելու վերաբերյալ, որն այժմ գործում է: ԱԺ-ում ելույթի ժամանակ ասաց «Հայաստան» խմբակցության պատգամավոր Աղվան Վարդանյանը և շեշտեց, որ այդ օրենքը լուջ խնդիրներ ունի Սահմանադրության, մարդու իրավունքների և ազատությունների պաշտպանության կոնվենցիայի հետ.
«Վիրավորանքի քրեականացումը որևէ իրավաչափ նպատակ չի հետապնդել, այն իրականում ունեցել է մեկ նպատակ՝ քրեաիրավական միջոցների և ընթացակարգերի գործադրմամբ, սպառնալիքով սահամանափակել ազատ խոսքը, հրապարակային քննադատությունը, հատկապես՝ հանրային պաշտոն զբաղեցնող անձանց դեպքում, մինչդեռ ՄԻԵԴ-ը բազմիցս նշել է, որ խոսքը ազատությունը կարող է լինել ոչ միայն ընդունելի խոսքը, այլ նաև այն արտահայտությունները, որոնք կարող են ցնցող և վիրավորական համարվել որոշ մարդկանց կողմից»,-ասաց նա:
Պատգամավորը հայտնեց, որ օրենքի շրջանակում արդեն իսկ 106 քրեական գործեր են հարուցվել, որոնցից վարույթ է ընդունվել 18-ը.
«Իմ խորին համոզմամբ՝ սա իրականում օրենք է մեկ մարդու, մեկ անձի դեմ քննադատությունը սահմանափակելու, պատժելու և քրգործեր հարուցելու համար:Վստահ եմ, որ այս 18 գործերից բոլորը վերաբերում են այդ մեկ մարդուն, և ընդդիմության նկատմամբ կատարված նման արարքների պարագայում որևէ իրավական հետևանքներ չեն առաջացել»,-ասաց Աղվան Վարդանյանը:
Ընդդիմադիր պատգամավորի արձանագրմամբ՝ օրենքում օգտագործված են արտահայտություններ, որոնք չափազանց գնահատողական են, ինչը ենթադրում է անորոշություն և շատ դեպքերում կարող են լինել կամայական մոտեցումներ.
«Չի կարելի միևնույն ժամանակ քրեական և քաղաքացիական պատասխանատվություն սահամանել նույն արարքի համար՝խախտելով դատվելու սահամանադրական արգելքը:
Օրենքն իր նպատակին չի ծառայելու, հայհոյանքը պետք է ոչ թե սպառնալիքով փորձենք դադարեցնել, այլ պետք է փորձենք օրինակ ծառայել, ինչպես երկրի բարձրաստիճան պաշտոնյաններն են պահում իրենց, այնպես էլ հասարակությունն է իրեն պահելու»,-ասաց Աղվան Վարդանյանը՝ հավելելով, որ այս օրենքով Հայաստանն ակնհայտ հետընթաց է ապրում ժողովրդավարության առումով.
«Նախկին ձեր սիրելի իշխանությունները ապաքրեականացրել են վիրավորանքի վերաբերյալ հոդվածները, դուք վերադարձնում եք նախկին վիճակին»,-ասաց Վարդանյանը:
