Թուրքիան հանդես է գալիս «հրահրող հռետորաբանությամբ»՝ խեղաթյուրելով պատմությունն ու աշխարհագրությունը. Հունաստանի վարչապետ
Թուրքիան ոչ միայն հանդես է գալիս «սադրող հռետորաբանությամբ», այլև ագրեսիվ գործողություններ է կատարում, որոնք խախտում են միջազգային իրավունքը և խաթարում կայունությունը Միջերկրական ծովի տարածաշրջանում։ Այս մասին չորեքշաբթի հայտարարել է Հունաստանի վարչապետ Կիրիակոս Միցոտակիսը ՌԴ նախագահ Վլադիմիր Պուտինի հետ բանակցություններից հետո, փոխանցում է ՏԱՍՍ-ը։
«Մենք քննարկել ենք նաև տարածաշրջանային զարգացումները, այն, ինչ տեղի է ունենում Արևելյան Միջերկրական ծովում», - ասել է Միցոտակիսը,- «Այստեղ զրուցակցիս հետ շատ անկեղծ եմ եղել, նրան ասել եմ, որ, ցավոք, Թուրքիան ոչ միայն հանդես է գալիս հրահրող հռետորաբանությամբ, խեղաթյուրելով պատմությունն ու աշխարհագրությունը, այլև ագրեսիվ գործողություններ է կատարում, որոնք խախտում են միջազգային իրավունքը և հաճախ ական են դնում տարածաշրջանում կայունության տակ...»:
Հունաստանի վարչապետի խոսքով՝ երկիրը միշտ բաց է «միջազգային օրինականության և, իհարկե, ծովի իրավունքի շրջանակներում երկխոսության համար, որին Ռուսաստանը միշտ աջակցել և աջակցում է որպես հիմք, էական հարթակ, որի օգնությամբ պետք է կարգավորվեն միջպետական վեճերը»։
Ինչ վերաբերում է Կիպրոսի խնդրին, ապա Միցոտակիսն իր երախտագիտությունն է հայտնել Ռուսաստանի հետևողական և կառուցողական դիրքորոշման համար։
«Սա Հունաստանի համար առաջնահերթ խնդիր է։ Ես վերահաստատեցի մեր հավատարմությունը ՄԱԿ-ի Անվտանգության խորհրդի բանաձևի շրջանակներում կենսունակ լուծման նպատակներին»,- ասել է նա՝ շարունակելով, որ այդ լուծման հիմքում ընկած է երկհամայնքային, երկգոտի ֆեդերացիայի տրամաբանությունը՝ մեկ իրավասուբյեկտայնությամբ և քաղաքացիություն։
«Կղզում երկու պետությունների ստեղծման տարբերակով լուծման ցանկացած քննարկում սկզբունքորեն պետք է մերժել»,- ասել է նա։
