Դասի ժամանակ Փաշինյանի հասցեին բռնության կոչ արած ուսուցչի դատական առաջին նիստը կլինի այսօր
Երևանի Գայի անվան թիվ 129 հիմնական դպրոցի պատմության ուսուցիչ Հակոբ Գրիգորյանի՝ վարչապետ Նիկոլ Փաշինյանի հասցեին դասի ժամանակ բռնության կոչ հնչեցնելու քրգործով առաջին դատական նիստը կկայանա այսօր՝ 17:00-ին։ Գործը մակագրվել է Երևանի առաջին ատյանի ընդհանուր իրավասության դատարանի դատավոր Մնացական Մարտիրոսյանին: Այս մասին տեղեկանում ենք դատական տեղկատվական համակարգից:
Ըստ մեղադրական եզրակացության՝ Հակոբ Գրիգորյանին մեղադրանք է առաջադրվել այն բանի համար, որ նա, աշխատելով որպես պատմության ուսուցիչ, համաձայն չլինելով Փաշինյանի վարած քաղաքականության հետ և քաղաքական այլ հայացքներ ունենալու հանգամանքով պայմանավորված՝ 2021 թվականի մայիսի 21-ին՝ ժամը 12:00-ի սահմաններում, 7-րդ դասարանի պատմության դասաժամին, օգտագործելով իր պաշտոնեական դիրքը, աշակերտների ներկայությամբ Փաշինյանի և նրա ընտանիքի անդամների նկատմամբ արել է բռնություն գործադրելու հրապարակային կոչեր։
Նա, մասնավորապես, հայտարարել է, որ Նիկոլ Փաշինյանին պետք է սպանել, նրան և նրա ընտանիքին պետք է հրապարակում վառել:
