Covid-19-ից ապաքինված ռուսաստանցիների վկայականների ժամկետը կերկարացվի մինչև 1 տարի
ՌԴ նախագահ Վլադիմիր Պուտինն աջակցել է կորոնավիրուսը հաղթահարած ռուսաստանցիների վկայականների վավերականության ժամկետը վեց ամսից մինչև մեկ տարի երկարացնելու գաղափարին։ Այս մասին նա ասել է կառավարության անդամների հետ հանդիպմանը, գրում է forbes.ru-ն:
Երկրի փոխվարչապետ Տատյանա Գոլիկովան հանդես է եկել վկայականների գործողության ժամկետը երկարացնելու առաջարկով։ Նրա խոսքով, իշխանությունները նման որոշման են հանգել «մեր գիտնականների՝ իմունիզացիայի ոլորտում փորձագետների հետ միասին՝ հաշվի առնելով ներքին և միջազգային հետազոտությունների արդյունքները»։
«Այս քայլին նպաստում է նաև այն, որ Ռուսաստանում «վարակման դեպքերի ընդհանուր թվում կրկնավարակների մասնաբաժինը ընդամենը 0,74 է», - նշել է փոխվարչապետը։
«Ուրեմն այդպես էլ կանենք», - պատասխանել է Պուտինը Գոլիկովային:
ՌԴ նախագահը հիշեցրել է, որ Առողջապահության համաշխարհային կազմակերպությունը խորհուրդ է տալիս վերապատվաստվել վեց ամիս հետո, սակայն յուրաքանչյուր երկիր կարող է ինքնուրույն որոշում կայացնել՝ կախված իրավիճակից։ Գոլիկովան հաստատել է, որ պատվաստումների միջև առաջարկվող միջակայքը վեց ամիս է, իսկ կորոնավիրուսից ապաքինված ռուսների համար օպտիմալ ժամկետը մեկ տարին է։
