Այսօր հակառակորդի կրակոցից զոհված զինծառայողն ազգությամբ եզդի էր

Այսօր ադրբեջանական կրակոցների հետևանքով զոհված ժամկետային զինծառայող Սուրեն Յուրիկի Սաֆարյանն ազգությամբ եզդի էր։ Այս մասին  հայտնել է Եզդիների ազգային միության նախագահ Խդր Հաջոյանը:

«Այսօր ժամը 18:10-ի սահմաններում, Ադրբեջանի ԶՈՒ ստորաբաժանումները տարբեր տրամաչափի հրաձգային զինատեսակներից կրակ են բացել հայ-ադրբեջանական սահմանի, մասնավորապես՝ Գեղարքունիքի մարզի Նորաբակ գյուղի հատվածում տեղակայված հայկական դիրքերի ուղղությամբ, ինչի հետևանքով մահացու հրազենային վիրավորում է ստացել ՀՀ ՊՆ N զորամասի ժամկետային զինծառայող, ազգությամբ եզդի շարքային Սուրեն Յուրիկի Սաֆարյանը (ծնվ. 2002թ.)։
 

Խորը ցավով տեղեկացա և կիսում եմ կորստյան ծանր վիշտը և իմ ցավակցությունն ու զորակցությունն եմ հայտնում Սուրեն Սաֆարյանի ընտանիքի անդամներին, հարազատներին և ծառայակիցներին»,- գրել է նա:

Ըստ լրատվամիջոցների՝ Սաֆարյանը Արագածոտնի մարզի Ալագյազ համայնքից էր։ 19-ամյա զինծառայողը բանակ զորակոչվել էր նախորդ տարի։