Սյունիքի նկատմամբ իշխանույթունը հատուկ վերաբերմունք ունի. Աննա Գրիգորյան
Ես առհասարակ դավադրապաշտության տեսությունների կողմնակից չեմ, բայց այն գործընթացները, որոնք տեղի են ունենում Սյունիքի համայնքապետերի հետ կապված, ինձ թույլ է տալիս ենթադրել, որ գուցե Սյունիքում այնպիսի գործընթացներ են նախատեսվում, որոնց իրականացման համար անհրաժեշտ է, որպեսզի ուժեղ համայնքապետերը հայտնվեն լուսանցքում: Այս մասին այսօր լրագրողների հետ զրույցում ասել է «Հայաստան» խմբակցության պատգամավոր Աննա Գրիգորյանը.
Աննա Գրիգորյանը նշեց, որ հիմա էլ իշխանությունը փորձում է Կապանի համայնքապետ Գևորգ Փարսյանին հեռացնել, անգամ քրեական հետապնդում իրականացնել նրա նկատմամբ.
«Գևորգ Փարսյանն ընտրվել է 2018թ․և կարող է անգամ մինչև 2023թ․ պաշտոնավարել։ Այսօր այնպիսի իրավիճակ են ստեղծում, որ Կապանի ավագանու անդամները հրաժարական տան և նոր ընտրություններ լինեն: Որքանով ինձ է հայտնի, իշխանությունները նաև փորձել են քրեական հետապնդում իրականացնել Գևորգ Փարսյանի նկատմամբ, սակայն դա չի հաջողվել և փորձում են նրան այս կերպ հեռացնել»,-ասաց Աննա Գրիգորյանը.
Պատգամավորի արձանագրմամբ՝ Սյունիքի համայնքապետերի վերաբերյալ քաղաքական պատվեր կա իջեցված.
«Որևէ այլ համայնքների նկատմամբ նման հետապնդումներ չկան, իսկ Սյունիքի նկատմամբ իշխանույթունը հատուկ վերաբերմունք ունի: Սյունիքի համայնքապետերը մինչև ընտրությունները հստակ հայտնել են իրենց դիրքորոշումը և ասել, որ այս իշխանությունները պետք է հեռանան, որովհետև չեն կարողանում ապահովել մեր անվտանգությունը։ Նրանց նկատմամբ տեղի ունեցող գործընթացները պարզ հաշվեհարդար է»,-ասաց Աննա Գրիգորյանը:
