ՏԵՍԱՆՅՈՒԹ.Կրակել էր մի տղամարդու վրա, փախել դեպքի վայրից, ապա լքել Հայաստանը. նրան գտել են Մոսկվայում ու հետ բերել
Հունիսի 26-ին Մոսկվա-Երևան չվերթով ոստիկանության ՔՈ գլխավոր վարչության ծառայողների ուղեկցությամբ Հայաստան տեղափոխվեց Շենգավիթում հաշվառված 35-ամյա մի տղամարդ, որը 2012 թվականի հուլիսից ոստիկանության Նոր Նորքի բաժնի կողմից հետախուզվում էր սպանության փորձի մեղադրանքով. խափանման միջոցը՝ կալանք։
Ոստիկանությունից հայտնում են, որ նա 2012 թվականի հունիսի 22-ին ապօրինի պահվող ատրճանակից կրակել էր մի տղամարդու ու փախել դեպքի վայրից, ապա լքել էր Հայաստանը։ ՔՈԳՎ ծառայողները, համագործակցելով ՌԴ ՆԳՆ ՔՀ գլխավոր վարչության ծառայողների հետ, իրականացրին տարաբնույթ օպերատիվ-հետախուզական միջոցառումներ՝ պարզելով, որ հետախուզվողը, օգտագործելով բարեկամի անձնագրային տվյալները, ընտանիքի հետ բնակվում է Ռուսաստանում։
Հիշյալ փաստը հիմնավորվեց և նրա ՌԴ քաղաքացիությունը դադարեցվեց, ինչից հետո հետախուզվողը Մոսկվայում հայտնաբերվեց ու ձերբակալվեց։ Քննությունը շարունակվում է։
