Փետրվարի վերջին նախատեսվում է ամբողջ Երեւանում տեղադրել թափոնների տեսակավորման 135 կետ
Փետրվարի վերջին նախատեսվում է Երեւանի բոլոր վարչական շրջաններում տեղադրել թափոնների տեսակավորման 135 կետ՝ յուրաքանչյուր կետում 3-ական կոնտեյներ: Այս մասին փետրվարի 1-ին լրագրողների հետ հանդիպմանն ասաց Երեւանի քաղաքապետարանին առնընթեր «Շրջակա միջավայրի կանաչապատում եւ պահպանություն» ՊՈԱԿ-ի թափոնների տեսակավորման վարչության պետ Հայկ Հովհաննիսյանը:
Նրա պարզաբանմամբ՝ սկզբնական փուլում տեսակավորվելու է թուղթը (դեղին կոնտեյներներ), ապակին (մոխրագույն կոնտեյներներ), պլատիկը (կապույտ կոնտեյներներ), մնացած բոլոր թափոնների համար նախատեսված են կանաչ կոնտեյներներ: Հետագայում նախատեսվում է տեղադրել կարմիր կոնտեյներներ՝ տեքստիլ թափոնների համար:
Նրա խոսքով՝ աշխատանքների արդյունքներով այս տարի հնարավոր է կետերի ավելացում կամ աշխատանքների արդյունավետության մեծացման համար այլ միջոցների ընդունում: «Լոգիստիկան եւ աշխատանքի ճիշտ կազմակերպումը հասկանալու համար 1-2 վարչական շրջաններում իրականացվել է փորձնական ծրագիր: Հիմա արդեն ամբողջ Երեւանում տեղադրված են թափոնների տեսակավորման 60 կետեր: Այդպիսի կետեր առայժմ չկան Շենգավիթում, Մալաթիա-Սեբաստիայում, Նուբարաշենում, Էրեբունիում»,- շեշտեց Հովհաննիսյանը:
Պաշտոնյան հավելեց, որ տեսակավորման կանոնների խախտման դեպքում կիրառվելու են զսպող մեխանիզմներ, այդ թվում՝ մինչեւ 50 հազար դրամ տուգանք:
