Բելառուսում անցկացվող բողոքի ցույցերի ավելի քան 100 մասնակից է ձերբակալվել

Բելառուսում անցկացվող բողոքի ցույցերի ավելի քան 100 մասնակից է ձերբակալվել: Այս մասին հայտնում է ТАСС գործակալությունը՝ վկայակոչելով երկրի ՆԳՆ տվյալները:

Նշվում է, որ անօրինական հանրահավաքների մասնակիցների շրջանում ձերբակալությունները շարունակվում են:

Միևնույն ժամանակ «Վեսնա» իրավապաշտպան կազմակերպությունից հայտնել են, որ միայն Մինսկում 151 մարդ է ձերբակալվել: Իրավապաշտպանները հայտնել են նաև այլ քաղաքներում՝ Գրոդնոյում, Բրեստում և Բարանովիչիում, տեղի ունեցած ձերբակալությունների մասին:

Կիրակի՝ սեպտեմբերի 6-ին, ողջ երկրով մեկ զանգվածային բողոքի ցույցեր են տեղի ունենում: Մայրաքաղաքում մարդիկ երթով մոտեցել էին նախագահ Լուկաշենկոյի նստավայրին, որի մոտ շղթա էին կազմել ՕՄՕՆ-ականները:

Նշվում է, որ ուժայիններն արդեն բացել են արգելափակումը, իսկ ցուցարարները հեռացել են:

Ընդդիմության կողմնակիցների բողոքի ցույցերը Բելառուսում չեն դադարում գրեթե մեկ ամիս՝ օգոստոսի 9-ին կայացած նախագահական ընտրություններից ի վեր, որոնց արդյունքներով հաղթող է ճանաչվել գործող նախագահ Ալեքսանդր Լուկաշենկոն: