Եթե նորմալ եղավ, հաջորդ տարի կրկին սուբվենցիայով կբերենք էդպիսի ավտոբուսներ. Գյումրու քաղաքապետը՝ 3 նոր ավտոբուսների մասին
Սուբվենցիոն ծրագրով գնված և Գյումրու տոնի օրը տեղ հասած միկրոավտոբուսներն առաջին փորձարկել է քաղաքապետ Սամվել Բալասանյանը: Լրագրողների հարցին՝ լա՞վ մեքենա է, քաղաքապետը պատասխանեց. «Շատ, շատ, հրաշք է ուղղակի»:
Երեք փոքր ուղևորատար ավտոբուսները Գյումրիում են պիլոտային ծրագրով: Այս պահին իրականացված ծրագրի արժեքը, որով ձեռք է բերվել 3 տրանսպորտային միջոց, մոտ 43 մլն դրամ է: Գումարի 50 տոկոսը ներդրել է կառավարությունը, 50-ը՝ համայնքը:
Ավտոբուսներից մեկը նախատեսվում է Գյումրի այցելող հյուրերի համար: Մյուս երկուսը նպատակ կա օգտագործել որպես սովորական տրանսպորտային միջոց՝ քաղաքի երթուղային ցանցում:
«Հիմա կփորձարկենք: Տեսնենք ինչպես կաշխատի, եթե նորմալ եղավ, հաջորդ տարի կրկին սուբվենցիայով կբերենք էդպիսի ավտոբուսներ, որպեսզի քաղաքի երթուղային ցանցի խնդիրները վերջապես կարգավորել կարողանանք»,- տեղեկացրեց Սամվել Բալասանյանը:
