Հատուկ կարանտինային պայմաններ Բաթումում չենք հայտարարելու. Գախարիա
«Չնայած նրան, որ Բաթումում համավարակային իրավիճակը, կարծես թե, Վրաստանի մնացած շրջանների համեմատ ծանր է, մենք Բաթումում չենք նախատեսում ընդունել հատուկ կարանտինային պայմաններ, և քաղաքի փակման մասին խոսք չի գնում»,- այս մասին Վրաստանի վարչապետ Գիորգի Գախարիան հայտարարել է միջգերատեսչական համակարգող խորհրդի նիստում, փոխանցում է 1Tv.ge-ն։
Նրա խոսքերով՝ այսօր Բաթումում կենտրոնացած են բավականին մեծ թվով քաղաքացիներ, ովքեր հանգստանում են, և այստեղ անց են կացվում հետազոտություններ:
«Ինչպես գիտեք, Բաթումում արձանագրված դեպքերից 22-ը կապված է սննդի օբյեկտի հետ: Այսօր Բաթումում կենտրոնացած են բավականին մեծ թվով քաղաքացիներ, ովքեր հանգստանում են, և այստեղ անց են կացվում հետազոտություններ»,- ասել է Գիորգի Գախարիան:
Այսօր Վրաստանում գրանցվել է կորոնավիրուսի 38 նոր դեպք: Թբիլիսիի վարակիչ հիվանդությունների հիվանդանոցի բժշկական տնօրեն, Մարինա Էզուգբայայի հայտարարությամբ, կորոնավիրուսի 38 նոր դեպքերից 22-ը կապված է Բաթումի «Դոնա» հրուշակեղենի խանութի հետ, 7 դեպքը կապված է արդեն գրանցված դեպքերի հետ, չորսը ներմուծված է, իսկ հինգի դեպքում վարակման աղբյուրն անհայտ է:
