Կրակոցներ են եղել նաև Գեղարքունիքի և նախիջևանյան հատվածում. Արծրուն Հովհաննիսյանը մանրամասնում է
Երեկ, անցնող գիշերը Հայաստանի Հանրապետության ամբողջ սահմանի երկայնքով հակառակորդի կողմից իրականացվել է մոտ 120 կրակոցներ, խախտումներ, որոնք եղել են սահմանի ողջ երկայնքով: Այս մասին քիչ առաջ տեղի ունեցած ճեպազրույցում ասաց ՀՀ ՊՆ ներկայացուցիչ Արծրուն Հովհաննիսյանը։
«Հիմնականում կիրառվել են հրաձգային զենքեր՝ այդ թվում մեծ տրամաչափի, չի կիրառվել հրետանային կամ ավելի մեծ տրամաչափի միջոցներ։ Կրակոցները իրականացվել են ոչ միայն Տավուշի բուն մարտական գործողությունների հատվածում, այլև Տավուշի ամբողջ երկայնքով, այդ թվում նաև Նոյեմբերյանի ուղղությամբ։ Կրակոցներ եղել են նաև Գեղարքունիքի, ինչպես նաև նախիջևանյան հատվածում»,- ասաց Հովհաննիսյանը։
Անդրադառնալով Արցախում իրավիճակին՝ Հովհաննիսյանն ասաց, որ Արցախում ևս կրակել են հրաձգային զենքերից, կիրառվել են նաև մեծ տրամաչափի գնդացիրներ, բայց լարվածություն չկա։
