Ունենք հարաբերականորեն կայուն ծանրաբեռնվածություն մահճակալային ֆոնդի տեսանկյունից. Թորոսյան
Երեկ արձանագրված նոր դեպքերի թիվը հասել է 566-ի: Այս մասին կառավարության նիստի ընթացքում տեղեկացրեց ՀՀ առողջապահության նախարարը:
«Սա բացարձակ թվով, իհարկե, նշանակալի աճ է, բայց պետք է փաստենք նաև, որ հետազոտությունների թիվն էլ է մոտավորապես այդքան տոկոսով մեծ եղել: Արվել է 2233 թեստ՝ նախորդ օրվա 1751-ի փոխարեն: Ցավոք պետք է նշեմ, որ ունենք 18 մահվան դեպք: Այսպիսով ընդհանուր մահերի թիվը դառնում է 245: Ունենք հարաբերականորեն կայուն ծանրաբեռնվածություն մահճակալային ֆոնդի տեսանկյունից: Գումարային ունեցել ենք մոտ հինգ հարյուր հոգի ծայրահեղ ծանր և ծանր, սակայն կարող եմ փաստել, որ հիմնական մեծ վերակենդանացման բաժանմունքներում ազատ տեղեր եղել են այդպիսի կարիք ունեցող պացիենտներին տեղավորելու համար»,- ասաց Թորոսյանը:
Անդրադառնալով հոսպիտալացման կարիք ունեցող պացիենտների թվին՝ Թորոսյանը տեղեկացրեց՝ առավոտյան 09.00-ի դրությամբ կա 32 քաղաքացի, որոնք հոսպիտալիզացիայի կարիք ունեն:
Նրանցից չորսը տանն են, մյուսները՝ այլ հիվանդանոցներում, սակայն պետք է տեղափոխվեն կորոնավիրուսային բաժանմունքներ կամ հիվանդանոցներ:
