Ունենք երկու մեկուսացած անձ և մի քանի ինքնամեկուսացած աշխատակից․ Մնացականյանը՝ ԱԳՆ-ի աշխատակազմի մասին
Լրագրողներն այսօր ԱԺ-ում ԱԳՆ Զոհրաբ Մնացականյանից հետաքրքրվել են, թե ինչ թվով վարակակիրներ կան արտաքին գերատեսչությունում:
«Ընդհանուր առմամբ, մենք շատ վաղ շրջանում գնահատեցինք, թե ինչպես պետք է վերակազմակերպենք աշխատանքը նախարարությունում, առցանց աշխատանքը կազմակերպենք։ Առաջին շրջանում շատ ավելի մեծ ռեսուրս էր ներդրվում համավարակից բխող խնդիրներին առնչվելու։ Ամենամեծ խնդիրը քաղաքացիների վերադարձին վերաբերող հարցն էր, ինչ-որ նշաններ են նկատվում բնականոն աշխատանքի: Մեզ համար ամենամեծ խնդիրն է՝ ինչպես ապահովել բնականոն աշխատանքը։ Այս պահին կարողացել ենք անել, ունենք երկու հոգի, որ աշխատել են ու հիմա մեկուսացվել են ու մի քանի ինքնամեկուսացած, ովքեր շփումներ են ունեցել նրանց հետ»,- ասել է նա:
Լրագրողները հետաքրքրվել են նաև Հայաստանին տրվող օգնության կազմակերպման մասին, Զոհրաբ Մնացականյանը պատասխանել է.
«Մենք սերտ աշխատում ենք պարետատան շրջանակներում անմիջապես, այդ ամենը գնահատվում է ըստ անհրաժեշտության, օգնության մասին է խոսքը։ Տարբեր անհրաժեշտություններ կարող են լինել, կոնսուլտացիաների մասին, հիշում եք, որ ներկայացրել ենք, թե որքան պատրաստակամություն է հայտնվել աջակցության համար, և մենք բոլորս միասին բոլորիս օգնում ենք, երբ տարհանման հարցեր ենք լուծում: Միջազգային համագործակցությունը արտացոլվում է ճգնաժամային պայմաններում, կան երկրներ, որոնց կողմից արտահայտվել է պատրաստակամությունը»:
