Վարչապետ Նիկոլ Փաշինյանի ուղիղ եթերում ընթացող հարց ու պատասխանի առաջին հարցը վերաբերում էր նրա կուսակիցների խորհրդարանական խմբակցությանը։ Հարցի հեղինակը ակնարկում էր, որ իշխանական խմբակցության պատգամավորների մի մասը ուղղակի խոսում է և որևէ գործով զբաղված չէ։

Փաշինյանը այս հարցին պատասխանելիս ասաց, որ երբ ինքը ընդդիմադիր պատգամավոր էր, իրեն էլ էին ասում, թե միայն խոսում է և ոչ մի կարևոր գործ չի անում։ Ըստ այդմ՝ Փաշինյանը ասաց, որ չի կարելի թերագնահատել խոսքի ուժը, քանի որ խորհրդարանն էլ հենց մտքերի փոխանակության վայր է։

Նիկոլ Փաշինյանը նաև նշեց, որ խորհրդարանական մեծամասնության լավագույն գնահատականը տրվել է Ադրբեջանում, երբ Հայաստանի ընտրություններից հետո նույնպիսի ընտրություններ արեցին Ադրբեջանում։

Փաշինյանը հիշեցրեց, որ Ադրբեջանում այդ փոփոխության նպատակը ավելի երիտասարդ և գործունյա խորհրդարան ունենալն էր, ինչը Փաշինյանը պայմանավորում է Հայաստանի խորհրդարանի փոփոխությամբ: