Վիտալի Բալասանյանի ուղերձը

Արվախի հերոս Վիտալի Բալասանյանը շնորհավորական ուղերձ է հղել՝ ԱՀ պետական անկախության մասին հանրաքվեի և Սահմանադրության օրվա առթիվ։ Ուղերձը՝ ստորև․

««Հանուն Արցախի» համազգային շարժմանը միացած կազմակերպությունների, անձանց և անձամբ իմ անունից ի սրտե շնորհավորում եմ ձեզ՝ ԱՀ պետական անկախության մասին հանրաքվեի և Սահմանադրության օրվա առթիվ:

Դեկտեմբերի 10-ը մեր ազատագրական պայքարի ճանապարհին դարձավ ճակատագրական որոշումներ ընդունելու օր, որոնք նախանշեցին մեր պետության կայացման ու զարգացման հետագա ուղին:

Հետաքրքիր մի զուգադիպությամբ Արցախի ժողովուրդը բախտորոշ համաժողովրդական քվեարկությունները երկու անգամ կազմակերպել է հենց դեկտեմբերի 10-ին` մարդու իրավունքների պաշտպանության միջազգային օրը: 1991թ.  այս օրը, ռումբերի պայթյունների ներքո, Արցախի ժողովուրդը միասնականորեն «Այո´» ասաց անկախությանը: 2006 թ. այս օրն էլ հայկական Արցախ պետությունը հանրաքվեով Սահմանադրություն ընդունեց:

Այսօր Արցախն ունի պետական բոլոր խորհրդանիշները, ունի պետականությունը փաստող բոլոր կառույցներն ու ինստիտուտները: Արցախն այսօր առավել կայացած  պետություն է, քան իրեն բռնակցել փորձող Ադրբեջանը:

Մեզանից  ամեն ոք պետք է գնահատի իր սեփական անկախությունը, բոլորի անկախության զգացողության համագումարն էլ կապահովի երկրի անկախությունը:

Մեկ անգամ ևս շնորհավորում եմ բոլորիդ՝ պետական այս կարևորագույն տոնի կապակցությամբ և մաղթում խաղաղություն, քաջառողջություն և ամենայն բարիք»,-նշված է ուղերձում: