Ողբերգական դեպք՝ Կոտայքի մարզում. 61-ամյա տղամարդը ամառանոցի տանիքում հոսանքահարվել և տեղում մահացել է
SHAMSHYAN.com-ի տեղեկություններով՝ այսօր՝ նոյեմբերի 29-ին, ողբերգական դեպք է տեղի ունեցել Կոտայքի մարզում։ Ժամը 16։30-ի սահմաններում ոստիկանության Կոտայքի բաժին ահազանգ է ստացվել, որ Ձորաղբյուր գյուղի Ամառանոցային 15/1 տանը տղամարդու դի կա։ Ինչպես հայտնում է ֆոտոլրագրող Գագիկ Շամշյանը, ահազանգը փոխանցվել է նաև արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն։
Նշված վայր են ժամանել ԱԻՆ ՓԾ Կոտայքի մարզային փրկարարական վարչության հրշեջ-փրկարարական ջոկատը՝ 1 մարտական հաշվարկով։ Ժամանել է նաև ոստիկանության Կոտայքի բաժնի օպերատիվ խումբը։ Ոստիկաններն ու փրկարարները պարզել են, որ նշված տան տանիքում աշխատանքներ կատարելիս հոսանքահարվել և մահացել է 61-ամյա Ս. Առաքելյանը։ Գ. Շամշյանի տեղեկություններով՝ վերջինս հաշվառված էր Երևանում։
