Չի կարող որոշում կայացնել ժողովուրդը, հանրաքվեի խնդիր չէ սա. Արամ Մանուկյանը՝ Ամուլսարի հանքի շահագործման մասին
Նայում, ուսումնասիրում ենք բոլոր հնարավոր զեկույցները, հաշվարկները, բոլոր կողմերին հրավիրել ենք, էկոլոգներին, մասնագիտական ինֆորմացիա ենք հավաքում, որ մեր դիրքորոշումը հայտնենք: Այս մասին մամուլի ասուլիսին ասաց ՀԱԿ փոխնախագահ Արամ Մանուկյանը՝ անդրադառնալով Ամուլսարի հանքի շահագործման հարցին:
«Փոշին ակնհայտ է, ստորջրյա հոսքերի վնասը ակնհայտ է, բոլորում այդ վտանգները կան, ոչ մեկը չի ասում, որ վտանգ չկա, բոլոր զեկույցները դրանք մեղմելու մասին են, և այստեղ իրենք պետք է չափեն»,-ասաց նա և նշեց, որ գիտեն վտանգների մասին, և իրեն մտահոգող շատ բաներ կան:
Ամեն դեպքում Արամ Մանուկյանը նշեց, որ տնտեսական էֆեկտ իսկապես կա: «Այն քաղաքական ուժերը, որոնք ստորագրել են պայմանագիրը, նրանք այսօր ասում են, որ հարկավոր է էկոլոգիան մաքրել, ազնիվ պայքար չի»,-ասաց նա:
Tert.am-ի հարցին, թե ինչ իրավիճակում է հայտնվել վարչապետը, և արդյոք այստեղ ինքը, թե ժողովուրդը պետք է որոշում կայացնի, Արամ Մանուկյանն ասաց. «Նա թիմի հետ պետք է նստի, հնարավորինս անկեղծ խոսի, բոլոր պլյուսները և մինուսները պետք է քննարկել, ազնիվ չի ասել, թե մինուսներ չկա»,-ասաց նա և նշեց, որ շատ դժվար է որոշում կայացնելը:
«Չի կարող որոշում կայացնել ժողովուրդը, հանրաքվեի խնդիր չէ սա, ծանր, խիստ մասնագիտական պատասխանատու ուժ պետք է իմանա և որոշում կայացնի, արտաքին քաղաքական ճնշումներ կան, սա խիստ մասնագիտական հարց է»,-իր անձնական կարծիքն ասաց Արամ Մանուկյանը:
Դիտարկմանը, թե այդ դեպքում ուր մնաց ժողովրդի իշխանությունը, ինչի շեշտադրմամբ Նիկոլ Փաշինյանը դարձավ վարչապետ, նա նշեց, որ եթե անգամ դիմես հանրաքվեի, արդյունքում ստանալու ես այն, ինչ որոշել են քաղաքական ուժերը:
Այսօրվա իշխանությունները հստակ չեն արտահայտում իրենց դիրքորոշումն արցախյան խնդրի վերաբերյալ, արտաքին դիվանագիտության հարցում, Ռուսաստանի հարցում: Այս մասին այսօր մամուլի ասուլիսին, անդրադառնալով ներկայիս իշխանության քաղաքականությանը, ասաց ՀԱԿ փոխնախագահ Արամ Մանուկյանը՝ նշելով, որ շատերը հստակություն են պահանջում:
«Կարող է առաջին ամիսներին այս հստակությունը չլինեին, բայց ալիքի շրջանն անցել է, և իշխանությունները պետք է հստակ իրենց քաղաքականությունը մատչելի ներկայացնեն, թե ինչ է նշանակում տնտեսական հեղափոխություն, բարեփոխումներ:
«Ես շվարած էի դատական ռեֆորմի հարցում, գնացինք խորհուրդ տվեցինք, քննարկեցին, բայց կորավ այդ ամենը: Սկզբում խոսում էին վեթինգի, անցումային արդարադատության մասին: Բումի նման հնչեց տնտեսական հեղափոխությունը, բայց ես չեմ տեսել դրա տանողին, դա վարչապետը չի կարող, թիմը պետք է տանի»-ասաց նա:
Արամ Մանուկյանը նշեց, որ Ղարաբաղի հարցի հետ կապված պարզության, հստակության կարիք կա: «Երկրի ղեկավարությունն իր դիրքորոշումը կոնկրետացնելու անհրաժեշտություն ունի: Մենք գոնե ունենք մեր մոտեցումը, Սերժն էլ, Քոչարյանն էլ խուսափում էին այդ հարցի հստակությունից, մեզանից հստակ ոչ մեկը չի եղել, մենք մեր սեփական մոտեցումն ունենք»,-ասաց նա և նշեց, որ դա փոխզիջումային լուծում է՝ եռանախագահության առաջարկներով:
«Այս իշխանությունը պետք է ռեֆորմները սկզբում անի, որքան ուշացնում ես ցավոտ ռեֆորմները, դրանց իրականացման հնարավորությունը սպառվում է: Ավելի շատ ռեֆորմներ այս պառլամենտը կարող էր անել վեց ամիս առաջ, քան վեց ամիս հետո»,-ասաց նա և նշեց, որ գնալով կարող են ստորգետնյա հոսանքներ առաջանալ «Իմ քայլում»:
Չնայած դրան՝ Արամ մանուկյանը նշեց, որ լավ բաներ անում են այս իշխանությունները: «Ազնիվ ու գրագետ պաշտոնյա գտնելը դժվար է»,-ասաց նա:
