Մի քանի տասնյակ վիրավորներ Վրաստանում. պաշտոնյաների արձագանքը
Թբիլիսիում` Վրաստանի խորհրդարանի շենքի դիմաց, իրավիճակը շարունակում է լարված մնալ: Այս մասին հայտնում է Aliq.ge-ն։
Նշվում է մի քանի տասնյակ վիրավորների մասին։ Բողոքի ակցիայի ժամանակ տուժած լրագրողներից մեկն էլ կորցրել է աչքը:
Ըստ աղբյուրի՝ տղամարդու դեմքին, հավանաբար, ռետինե փամփուշտ է դիպել:
Նշվում է, որ տուժածը վրացական հեռուստաընկերություններից մեկի աշխատակից է:
Իրավիճակին անդրադարձել է Վրաստանի մարդու իրավունքների պաշտպան Նինո Լոմջարիան՝ հասարակության բողոքն արդարացի համարելով, սակայն, միևնույն ժամանակ բռնությունը դատապարտելով։ Վրաստանի վարչապետ Մամուկա Բախտաձեն էլ հայտարարել է, որ զանգվածային անկարգությունների կազմակերպիչները պատասխանատվություն են կրելու երկրում իրավիճակն ապակայունացնելու փորձի համար:
«Մեր խնդիրն է շտկել իրավիճակը, թուլացնել լարվածությունը: Միջազգային հանրությունը և դիվանագիտական ողջ կորպուսը լիարժեք տեղյակ են, թե ինչպես են զարգացել իրադարձությունները: Մենք խոստանում ենք հասարակությանը, որ այդ մարդիկ ստիպված կլինեն պատասխան տալ անկարգությունների և երկրում իրավիճակն ապակայունացնելու համար:
Մենք ուզում ենք ևս մեկ անգամ մեր քաղաքացիներին հանդարտության կոչ անել: Կառավարությունը կապահովի յուրաքանչյուր քաղաքացու անվտանգությունը և կվերականգնի հասարակական կարգը», - ասել է նա:
