Արարատում 2 անչափահասի դանակահարության վայրն ու շարժառիթը. մանրամասներ

ՀՀ քննչական կոմիտեի Արարատի մարզային քննչական վարչությունում ձեռնարկված քննչական գործողությունների արդյունքում բացահայտվել է անչափահասների դանակահարության դեպքը: Մեկ անձ ձերբակալվել է: Ինչպես տեղեկացնում է ՀՀ քննչական կոմիտեի տեղեկատվության և հասարակայնության հետ կապերի բաժինը, նախնական տվյալներով` 2019 թվականի մայիսի 9-ին՝ ժամը 22-ի սահմաններում, Արարատի մարզի բնակիչը՝ ծնված 2001թ., իրեն անձնական վիրավորանք հասցնելու պատճառով վիճաբանել է երկու անչափահաս համագյուղացիների հետ, որի ընթացքում իր մոտ գտնվող դանակով հարվածել և մարմնական վնասվածքներ է պատճառել վերջիններիս: Դեպքի առթիվ ՀՀ ՔԿ Արարատի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով: Ձեռնարկված քննչական և դատավարական այլ գործողությունների արդյունքում պարզվել է դեպքի վայրը, շարժառիթը: 2001 թվականին ծնված երիտասարդը ձերբակալվել է: Դեպքի վայրի զննությամբ հայտնաբերվել և վերցվել են արնանման հետքերի նմուշներ, նշանակվել է դատաբժշկական փորձաքննություն, կատարվել են առգրավումներ: Նախաքննությունը շարունակվում է: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: