Ռուսական առաջին ալիքը «Ձայնը. Երեխաներ» նախագծի 6-րդ եթերաշրջանի շրջանակում տեսանյութ է պատրաստել շոուի մասնակից ստեփանակերտցի Միշա Գրիգորյանի մասին։ Ռեպորտաժում Միշա Գրիգորյանն ու իր մայրը ներկայացնում են տղայի ծննդավայրը, հայրենիքը, առօրյան ու հետաքրքրությունները: «Ես Հայաստանից եմ, Ստեփանակերտից: Իմ ընտանիքը երաժշտական է, մայրս մանկապարտեզում երաժշտության ուսուցչուհի է, հայրս զինվորական նվագախմբի դիրիժորն է»,- ասում է Միշան: Միշայի խոսքով` Հայաստանը շատ հյուրընկալ երկիր է, խոհանոցն էլ շատ համեղ։ Գտնվելով բարեկամների մոտ Մոսկվայում`նա մայրիկի հետ միասին պատրաստել է ավանդական ժենգյալով հաց։ «Ես փորձել եմ պատրաստել, վատ չի ստացվում», – ասում է Միշան։ Չնայած զբաղվածությանը, տղան ակտիվ կենսակերպ է վարում: Վոկալի պարապմունքներից հետո, ազատ ժամանակ Միշան զբաղվում է նրանով, ինչ հետաքրքիր է իրեն` նկարչություն, լող, ֆուտբոլ։ Խոսում է նաև «Եվրատեսիլին» մասնակցության մասին, իսկ ռուսական «Ձայնը. Երեխաներ» շոուին մասնակցել է հաղթելու նպատակով: «Ես ընդհանրապես չեմ մտահոգվում, որ կակազում եմ։ Հակառակը, դա ինձ հանգստություն է տալիս», – վստահեցնում է տղան։