Լևոն Սարգսյանի հայտնաբերման մասին տեղեկություններ չունենք. Գլխավոր դատախազ
ՀՀ երրորդ նախագահ Սերժ Սարգսյանի եղբայր Լեւոն Սարգսյանի հայտնաբերման վերաբերյալ մենք դեռեւս տեղեկություններ չունենք: Այս մասի ԱԺ-ում լրագրողների հետ զրույցում նշեց ՀՀ գլխավոր դատախազ Արթուր Դավթյանը:
Նրա խոսքով՝ էքստրադիցիոն գործընթացը սկսվում է, երբ որ անձը հայտնաբերվում է, ձերբակալվում է եւ այդ մասին տեղեկացվում է ՀՀ իրավապահ մարմիններին, ինչպես օրինակ Նարեկ Սարգսյանի դեպքում:
Դիտարկմանը, որ ԱԱԾ տնօրեն Արթուր Վանեցյանն ասել է, որ իրենք գիտեն Լեւոն Սարգսյանի գտնվելու վայրը՝ նա արաբական երկրներից մեկում է, գլխավոր դատախազն արձագանքեց. «ԱԱԾ տնօրենը կարող է ամենատարբեր օպերատիվ տեղեկություններն ունենալ ձեզ հետ մեծահոգաբար կիսվել: Մեզ հետ կիսվելը շատ հաճելի պրոցես է, բայց քրեադատավարական առումով ոչ մի նշանակություն չունի: Երբ այդ երկրի մարմինները հայտնաբերում են ու մեզ հայտնում են, այդ ժամանակ առաջանում են իմ գործողությունները: Հաստատումն այն է, որ իրավապահ մարմինները հայտնաբերում են, մնացածն ինձ համար նշանակություն չունի»:
