Մարտի 27-ին արտակարգ դեպք է տեղի ունեցել Երևանում: Ժամը 14:10-ի սահմաններում Արտակարգ իրավիճակների նախարարության փրկարար ծառայության 911 օպերատիվ կառավարման կենտրոն ահազանգ է ստացվել, որ Արաբկիր վարչական շրջանի Վաղարշյան 18 շենքի 3-րդ հարկի բնակարաններից մեկի լվացքի պարանի վրա եղած լվացքը վառվում է: Shamshyan. com-ի հաղորդմամբ՝ մինչ դեպքի վայր կժամաներ ԱԻՆ ՓԾ թիվ 5 հրշեջ-փրկարարական ջոկատը, այդ պահին նշված վայրով անցնող, նույն շենքի բնակիչ, 14-ամյա Գագիկ Հովակիմյանը նկատել է կրակը և, թողնելով 7-ամյա քրոջը՝ Վիկտորիային, բարձրացել է նշված բնակարան, մտել պատշգամբ և նախ՝ կանխել կրակի տարածումը, ապա՝ մարել այն: Արդեն դեպքի վայր ժամանած հրշեջ-փրկարարները հարևաններին ասել են, որ իրենք էլ անելիք չունեն, քանի որ 14-ամյա տղան հրշեջին վայել կանխել է կրակի տարածումն, ապա՝ մարել այն: Պարզվել է, որ այրվել է նշված շենքի թիվ 68 բնակարանի բնակիչ Նարինե Հովաննիսյանին պատկանող լվացքը, մասամբ էլ թիվ 71 բնակարանի բնակչի պարանը, քանի որ 3-րդ հարկի կրակն ընկել է ներքևի հարևանի լվացքի վրա: