ՏԵՍԱՆՅՈՒԹ. Փաշինյանը դեռ չի մարել լվացքի մեքենայի ապառիկը

Մեր տանը ինչ կա՝ սառնարան, լվացքի մեքենա և այլն, մենք վարկով ենք առել: Այս մասին խորհրդարանում հայտարարեց ՀՀ վարչապետ Նիկոլ Փաշինյանը: «Շատ հարմար վարկեր են առաջարկում. Ամիսը ընդամենը 6 հազար դրամ վճարելով դու ձեռք ես բերում ասենք լվացքի մեքենա: Հարց է ծագում՝ ինչու միանգամից 300 հազար դրամ տաս, եթե կարող ես ամիսը ընդամենը 6 հազար դրամ վճարելով լվացքի մեքենա ունենալ: Եթե չեմ սխալվում, մեր լվացքի մեքենայի վարկը դեռ չենք վերջացրել»,-ասաց Փաշինյանը: Սրան արձագանքեց ԱԺ նախագահ Արարատ Միրզոյանը. «Պարոն վարչապետ, նույն տրամաբանությամբ էն օրը գնացի հեռուստացույց վերցնելու, էլ ինձ ապառիկ չտվեցին, Հարկադիրը կալանք էր դրել իմ հաշվի վրա: Չվճարած տուգանք ունեի»: Սա առաջ բերեց վարչապետի եւ ներկաների բուռն ծիծաղը. «Վաղը կգրվի, որ դուք պարոն Զեյնալյանի հետ ներքաղաքական խնդիրներ ունեք, դրա համար ինքը Հարկադիրով ձեր հաշիվների վրա կալանք է դրել: Այնպես որ իզուր դա ասեցիք, նոր քաղաքական հսկայական ինտրիգ դրեցիք, որն առաջիկա 6 ամիսների քննարկման նյութն է լինելու»,-ասաց Փաշինյանն ու հարցրեց. «Ընդ որում, ես ե՞մ ասել, որ կալանքը դնեն, թե ես չեմ ասել»: Տեսանյութը` News. am-ի: