ՏԵՍԱՆՅՈՒԹ.Ուժեղ թայֆուն՝ Չինաստանում. 700 հազար մարդ տարհանվել է

Չինաստանին պատուհասել է «Հունսյա» թայֆունը, ինչի հետևանքով ավելի քան 700 հազար մարդ տարհանվել է:

Փոթորիկը հարվածել է Չինաստանի հարավային ափին հուլիսի 26-ի վաղ առավոտյան։ Փոթորկի կենտրոնում քամու արագությունը հասել է 45 մ/վրկ-ի՝ պոկելով տանիքներ և շենքերի ծածկույթներ։

Աղետի սպառնալիքի պատճառով իշխանությունները շտապ տարհանել են ավելի քան 700,000 մարդու։ Ամենամեծ թվով բնակիչներ տարհանվել են Հույչժոուից (205,000) և Շանվեյից (192,000)։ Տուժած շրջանների դպրոցները փակվել են, բացվել են ժամանակավոր կացարաններ, և հայտարարվել է կարմիր տագնապի մակարդակ՝ արագ ջրհեղեղի վտանգի պատճառով։ Օդերևութաբանները կանխատեսում են, որ ուժեղ անձրևները կշարունակվեն մինչև երեքշաբթի՝ ազդելով նաև հարևան նահանգների վրա։

Սա այս ամսվա ընթացքում Չինաստանին հարվածող երրորդ արևադարձային ցիկլոնն է։ Քանի որ այն շարժվում է դեպի ցամաք, թայֆունը աստիճանաբար թուլանում է։