«Արարատցեմենտ»-ը կկառավարի պետությունը․ շուտով կառավարիչ կնշանակվի

Հակակոռուպցիոն դատարանի որոշմամբ և Գլխավոր դատախազության միջնորդության հիման վրա «Արարատցեմենտ» ընկերությունը հանձնվել է Հայաստանի Հանրապետության կառավարմանը՝ ի դեմս Էկոնոմիկայի նախարարության։ Այս մասին ֆեյսբուքյան իր էջում հայտնել է էկոնոմիկայի նախարար Գևորգ Պապոյանը։

Նախարարի խոսքով՝ հուլիս ամսվա ընթացքում, օրենքով սահմանված կարգով, կնշանակվի «Արարատցեմենտ»-ի կառավարիչը։

Մինչ այդ Պապոյանը ընկերության աշխատակիցներին կոչ է արել բարեխղճորեն և պատասխանատվությամբ կատարել իրենց պարտականությունները՝ ընդգծելով, որ դա կօգնի խուսափել աշխատանքից ազատման կամ վարչական և քրեական պատասխանատվության հիմքերից։

«Իրենց գործի գիտակ, աշխատանքը բարեխիղճ ու պարտաճանաչ կատարող բոլոր աշխատակիցները կշարունակեն աշխատել»,- նշել է նախարար Գևորգ Պապոյանը։