Ռուսաստանն ու Չինաստանը խորացնում են համագործակցությունը Ուկրաինայի հարցում

Ռուսաստանն ու Չինաստանը տարբեր մակարդակներում քննարկում են Ուկրաինայի հակամարտության կարգավորման բոլոր հիմնական հարցերը։ Այս մասին հայտարարել է ՌԴ արտաքին գործերի նախարարի տեղակալ Անդրեյ Ռուդենկոն՝ «ТАСС»-ին տված հարցազրույցում։

Նրա խոսքով՝ Մոսկվան շարունակում է սերտ կապ պահպանել չինացի գործընկերների հետ՝ Ուկրաինայի շուրջ ստեղծված իրավիճակի վերաբերյալ։

«Մենք շնորհակալ ենք չինական կողմին ուկրաինական ճգնաժամի հարցում հավասարակշռված դիրքորոշման համար, որը հիմնված է դրա աշխարհաքաղաքական բնույթի և պատճառների խոր ըմբռնման վրա»,– ասել է Ռուդենկոն։

ՌԴ փոխարտգործնախարարը նշել է, որ Ռուսաստանը ողջունում է Չինաստանի՝ խաղաղ կարգավորման գործում դրական դեր ստանձնելու ձգտումը։

Ռուդենկոյի խոսքով՝ Մոսկվան գնահատում է, որ Պեկինը պահպանում է միջազգային իրավունքի և ՄԱԿ-ի կանոնադրության սկզբունքներին հետևելու դիրքորոշումը, ինչպես նաև Ռուսաստանի հետ ռազմավարական գործընկերությունը։

Նա հավելել է, որ Ռուսաստանն ու Չինաստանը դեմ են այն մոտեցմանը, երբ պետությունները կամ դաշինքները ռազմական, քաղաքական կամ այլ առավելություններ ստանալու նպատակով վնաս են հասցնում այլ երկրների անվտանգության շահերին։