Իրանի ԱԳ նախարարը չի հանդիպել նոր գերագույն առաջնորդին․ «Նրա հետ հանդիպում են միայն ընտրյալները»

Իրանի արտաքին գործերի նախարար Աբբաս Արաղչին հայտարարել է, որ Մոջթաբա Խամենեին երկրի գերագույն առաջնորդ նշանակվելուց հետո անձամբ չի հանդիպել նրան։

Արաղչիի խոսքով՝ նոր առաջնորդի հետ հանդիպելու հնարավորություն է ունեցել մարդկանց «շատ փոքր շրջանակ»։ Նա նշել է, որ Մոջթաբա Խամենեիի հետ անձնական հանդիպումները բացառիկ բնույթ են կրում, և նրան կարող են հանդիպել միայն ընտրյալները։

Լրատվամիջոցների փոխանցմամբ՝ Մոջթաբա Խամենեին հանրության առջև չի հայտնվում և գտնվում է խիստ պահպանվող վայրում։ Տարբեր հրապարակումներում նշվում է, որ անվտանգության նկատառումներից ելնելով՝ նրա շփումները սահմանափակված են, ինչը նաև բազմաթիվ քննարկումների առիթ է դարձել նրա առողջական վիճակի վերաբերյալ։

Սակայն այս տեղեկությունները պաշտոնապես չեն հաստատվել, և իրանական իշխանությունները չեն մեկնաբանել այդ հրապարակումները։



«Նրա հետ հանդիպում են միայն ընտրյալները»․ Իրանի ԱԳ նախարարը չի տեսել նոր գերագույն առաջնորդին