Wildberries-ը ժամանակավորապես կհանի վնասված պահեստների ապրանքները վաճառքից

Wildberries-ի հիմնադիր Տատյանա Կիմը հայտարարություն է տարածել՝ անդրադառնալով ընկերության լոգիստիկ կենտրոնների վրա իրականացված հարվածների հետևանքներին։

Նրա խոսքով՝ ընկերությունը պետական կառույցների հետ շարունակում է աշխատել՝ վնասների վերացման ուղղությամբ։

«Էլեկտրոստալում փրկարարները շարունակում են մարել հրդեհի մնացած օջախները և վերացնել հետևանքները, իսկ Կոտովսկում հրդեհն ամբողջությամբ մարվել է»,- նշել է Կիմը։

Նա հավելել է, որ ընկերությունը պատրաստ է անհրաժեշտ աջակցություն ցուցաբերել տուժած աշխատակիցներին և կոչ է արել նրանց կապ հաստատել WB JOB հարթակի միջոցով։

Wildberries-ը նաև հայտնել է, որ վաճառողները կարող են իրենց նախատեսված մատակարարումները տեղափոխել ընկերության այլ ազատ լոգիստիկ կենտրոններ, իսկ համապատասխան տեղեկատվությունը պարբերաբար թարմացվում է պաշտոնական ալիքներում։

Ընկերության փոխանցմամբ՝ վնասված լոգիստիկ կենտրոններում պահվող ապրանքները ժամանակավորապես հանվել են վաճառքից, իսկ դրանց վերաբերյալ լրացուցիչ տեղեկատվություն կհրապարակվի առաջիկայում։

«Ես և իմ թիմն անում ենք հնարավոր ամեն ինչ։ Շնորհակալություն բոլորին աջակցության համար»,- ասվում է Տատյանա Կիմի հայտարարության մեջ։