Իրանի գերագույն առաջնորդը չի երևա հանրության առաջ մինչև ԱՄՆ-ի հետ պատերազմի ավարտը

Իրանի գերագույն առաջնորդ Մոջթաբա Խամենեին անվտանգության նկատառումներով առաջիկայում չի հայտնվի հանրության առաջ։ Այս մասին հայտնում է ՏԱՍՍ-ը՝ հղում անելով իրանական աղբյուրին։

Աղբյուրի փոխանցմամբ՝ Խամենեին հանրային միջոցառումներին չի մասնակցի այնքան ժամանակ, քանի դեռ շարունակվում է Իրանի ռազմական հակամարտությունը ԱՄՆ-ի և Իսրայելի հետ։

«Անվտանգության նկատառումներից ելնելով՝ նա մոտ ժամանակներս չի հայտնվի հանրության առաջ։ Կառավարությունը սպասում է, որ իրավիճակը կայունանա, որից հետո նա կհայտնվի հանրության առաջ»,- հայտնել է աղբյուրը։

Նշվում է, որ որոշումը կապված է պատերազմի և անվտանգության իրավիճակի հետ։

Ավելի վաղ հաղորդվել էր, որ ԱՄՆ-ն և Իսրայելը ռազմական գործողություններ են սկսել Իրանի դեմ։ Իրանական կողմի տվյալներով՝ հարվածների հետևանքով զոհվել է նաև երկրի նախկին գերագույն առաջնորդ Ալի Խամենեին։

Հետագայում Վաշինգտոնն ու Թեհրանը ստորագրել էին փոխըմբռնման հուշագիր՝ ռազմական գործողությունները դադարեցնելու վերաբերյալ, սակայն ավելի ուշ ԱՄՆ-ը վերսկսել էր հարվածները՝ մեղադրելով Իրանին ձեռք բերված պայմանավորվածությունները խախտելու մեջ։

Իրանի ԱԳՆ ներկայացուցիչ Էսմայիլ Բաղային հայտարարել էր, որ Թեհրանը չի խախտել ԱՄՆ-ի հետ կնքված համաձայնագիրը, իսկ դրա չկատարման պատասխանատվությունը կրում է Վաշինգտոնը։