700 կիլոմետր հեռավորության վրա թիրախներ են խոցվել․ Զելենսկին հայտարարություն է արել

Ուկրաինայի նախագահ Վլադիմիր Զելենսկին իր տելեգրամյան հարթակում  հայտարարել է, որ ուկրաինական ուժերը հարվածներ են հասցրել Ռուսաստանի տարածքում գտնվող մի շարք թիրախների, ինչպես նաև օկուպացված տարածքներում և ծովային հատվածներում։

Նրա խոսքով՝ Մոսկվայի և Տամբովի շրջաններում խոցվել են երկու խոշոր լոգիստիկ օբյեկտներ, որոնք, ըստ Զելենսկու, օգտագործվել են անօդաչու թռչող սարքերի արտադրության համար անհրաժեշտ բաղադրիչների և նավիգացիոն սարքավորումների մատակարարումների ապահովման նպատակով։

Զելենսկին նշել է, որ հարվածներ են հասցվել նաև նավթային օբյեկտի, Ազովի և Սև ծովերի ջրային տարածքներում գտնվող թիրախների, ինչպես նաև Ղրիմում գտնվող օբյեկտների ուղղությամբ։

« 700 կիլոմետր հեռավորության վրա թիրախներ են խոցվել: Շնորհակալություն Ուկրաինայի պաշտպանության ուժերի յուրաքանչյուր ստորաբաժանման զինվորներին՝ ճշգրիտ և համակարգված աշխատանքի համար»,- գրել է Զելենսկին։