Ռուսաստանում սկսել են զանգվածաբար վաճառքի հանել բենզալցակայանները

Ռուսաստանում մասնավոր բենզալցակայանների սեփականատերերը և խոշոր ցանցերը սկսել են զանգվածաբար վաճառքի հանել իրենց բենզալցակայանները։ Այս մասին հայտնում է «Իզվեստիան»՝ հղում անելով առևտրային հարթակների տվյալներին։

Պարբերականի տեղեկություններով՝ վաճառքի է հանվել ավելի քան 150 բենզալցակայան։ Դրանց արժեքը տատանվում է 1-ից մինչև 150 միլիոն ռուբլու սահմաններում՝ կախված գտնվելու վայրից, տեխնիկական հագեցվածությունից, գործունեության ժամկետից և ձևաչափից։ Օրինակ՝ Ուֆայում 13 բենզալցակայանից բաղկացած ցանցը գնահատվել է 350 միլիոն ռուբլի։

Սեփականատերերը նշել են, որ վաճառքի հիմնական պատճառը ֆինանսական վիճակի վատթարացումն է։ Վաճառքից ստացված միջոցները նրանք նախատեսում են ուղղել պարտավորությունների մարմանը։

Նշվում է, որ վաճառքի են հանվել նաև «Գազպրոմ» և «Լուկոյլ» ընկերությունների առանձին բենզալցակայաններ՝ Աստրախանի, Ռոստովի, Տամբովի, Նիժնի Նովգորոդի, Տվերի, Տյումենի, Չելյաբինսկի, Կալուգայի մարզերում և Պերմի երկրամասում։

Անցած շաբաթ Ռուսաստանի փոխվարչապետ Ալեքսանդր Նովակը հայտարարել էր, որ երկրում վառելիքի պակաս է նկատվում։ Նրա խոսքով՝ դրա պատճառը նավթավերամշակման գործարանների վրա անօդաչու թռչող սարքերի հարձակումներն են, որոնց հետևանքով մի շարք ձեռնարկություններ մասամբ դադարեցրել են աշխատանքը։