Հայաստանի և Ադրբեջանի միջև դե ֆակտո խաղաղություն արդեն գոյություն ունի. Բայրամով

Ադրբեջանի արտգործնախարար Ջեյհուն Բայրամովը հայտարարել է, որ Բաքվի և Երևանի միջև դե ֆակտո խաղաղություն արդեն գոյություն ունի։ Նա այս մասին ասել է Մոսկվայում Ռուսաստանի արտգործնախարար Սերգեյ Լավրովի հետ բանակցություններից հետո։

Բայրամովի խոսքով՝ Ադրբեջանի նախաձեռնած խաղաղության քայլերը զգալիորեն արագացրել են երկու երկրների հարաբերությունների կարգավորման գործընթացը։

«Այսօր վստահորեն կարելի է ասել, որ Բաքվի և Երևանի միջև դե ֆակտո խաղաղություն գոյություն ունի։ Ադրբեջանի խաղաղ նախաձեռնությունները զգալիորեն արագացրել և նպաստել են Հայաստանի և Ադրբեջանի հարաբերությունների կարգավորմանը», - նշել է նա։

Ադրբեջանի ԱԳ նախարարը հավելել է, որ Հայաստանի և Ադրբեջանի միջև հարաբերությունների կարգավորման գործընթացում վերջին շրջանում տեղի ունեցած իրադարձությունները, այդ թվում՝ խաղաղության համաձայնագրի նախագծի  համաձայնեցումը, բացառիկ հնարավորություն են ստեղծում տարածաշրջանում կայուն խաղաղության, անվտանգության և բարեկեցության ապահովման համար։

Բայրամովը նաև հայտնել է, որ բանակցությունների ընթացքում ռուս գործընկերոջը տեղեկացրել է, այսպես կոչված «ազատագրված տարածքներում» իրականացվող վերականգնման և վերակառուցման աշխատանքների, նախկին հարկադիր տեղահանվածների վերադարձի, ինչպես նաև Հայաստան-Ադրբեջան հարաբերությունների կարգավորման ընթացքի մասին։