ԱՄՆ-ն տեղեկություն է ստացել Թրամփի դեմ նախապատրաստվող մահափորձի մասին․ Axios

Իսրայելի հատուկ ծառայությունները Միացյալ Նահանգներին են փոխանցել հետախուզական տվյալներ, համաձայն որոնց՝ Իրանի բարձրաստիճան պաշտոնյաներից մեկն առաջարկել է կազմակերպել ԱՄՆ նախագահ Դոնալդ Թրամփի սպանությունը վերջինիս՝ Թուրքիա կատարելիք այցի ժամանակ։ Այս մասին հայտնում է Axios պարբերականը՝ հղում անելով իր աղբյուրներին։ 

Ստացված տեղեկատվությունից հետո ԱՄՆ Գաղտնի ծառայությունն անմիջապես խստացրել է նախագահի անվտանգության միջոցառումները։ Մասնավորապես, որոշում է կայացվել Թրամփի թռիչքի համար օգտագործել Air Force One-ի ավելի հին մոդելի օդանավը։ Ամերիկացի պաշտոնյաները, սակայն, հստակեցրել են, որ փոխանցված տվյալները հիմնված են եղել միայն մեկ և դեռևս չհաստատված աղբյուրի վրա։ 

Ըստ ամերիկյան կողմի գնահատականի՝ ստացված տեղեկատվությունն ունեցել է տեսական բնույթ և չի պարունակել իրական գործողությունների կոնկրետ ծրագիր։ Թուրքական հատուկ ծառայություններն իրենց հերթին մանրակրկիտ ստուգումներ են անցկացրել փոխանցված տվյալների հիման վրա։ Իրականացված հետախուզական աշխատանքների արդյունքում Անկարան եզրակացրել է, որ Թուրքիայի տարածքում Դոնալդ Թրամփի դեմ իրանական կողմից նախապատրաստվող կոնկրետ մահափորձի ծրագիր գոյություն չունի։